ಶ್ರೀಸ್ವಾಮಿನಾಥಸ್ತೋತ್ರಮ್

ಹೇ ಸ್ವಾಮಿನಾಥಾರ್ತ ಬಂಧೋ — ಭಸ್ಮ ಲಿಪ್ತಾಙ್ಗ ಗಾಂಗೇಯ ಕಾರುಣ್ಯ ಸಿಂಧೋ ।
ಹೇ ಸ್ವಾಮಿನಾಥಾರ್ತ ಬಂಧೋ ॥

ರುದ್ರಾಕ್ಷಧಾರಿನ್ನಮಸ್ತೇ ರೌದ್ರ ರೋಗಂ ಹರ ತ್ವಂ ಪುರಾರೇರ್ಗುರೋರ್ಮೇ ।
ರಾಕೇನ್ದುವಕ್ತ್ರಂ ಭವನ್ತಂ ಮಾರ ರೂಪಂ ಕುಮಾರಂ ಭಜೇ ಕಾಮರೂಪಮ್ ॥೧॥

ಮಾಂ ಪಾಹಿ ರೋಗಾದಘೋರಾತ್ - ಮಙ್ಗಳಾಪಾಙ್ಗಪಾತೇನ ಭಙ್ಗಾತ್ಸ್ವರಾಣಾಮ್ ।
ಕಾಲಾಚ್ಚ ದುಷ್ಪಾಕ ಕೂಲಾತ್ ಕಾಲಕಾಲಸ್ಯ ಸೂನುಂ ಭಜೇ ಕಾಂತ ಸೂನುಮ್ ॥೨॥

ಬ್ರಹ್ಮಾದಯೋ ಯಸ್ಯ ಶಿಷ್ಯಾಃ ಬ್ರಹ್ಮಪುತ್ರಾ ಗಿರೌ ಯಸ್ಯ ಸೋಪಾನಭೂತಾಃ ।
ಸೈನ್ಯಂ ಸುರಾಶ್ಚಾಪಿ ಸರ್ವೇ ಸಾಮವೇದಾದಿಗೇಯಂ ಭಜೇ ಕಾರ್ತಿಕೇಯಮ್ ॥೩॥

ಕಾಷಾಯ ಸಂವೀತಗಾತ್ರಂ ಕಾಮರೋಗಾದಿ ಸಂಹಾರಿ ಭಿಕ್ಷಾನ್ನ ಪಾತ್ರಮ್ ।
ಕಾರುಣ್ಯ ಸಮ್ಪೂರ್ಣ ನೇತ್ರಂ ಶಕ್ತಿ ಹಸ್ತಂ ಪವಿತ್ರಂ ಭಜೇ ಶಂಭುಪುತ್ರಮ್ ॥೪॥

ಶ್ರೀಸ್ವಾಮಿಶೈಲೇ ವಸನ್ತಂ ಸಾಧುಸಙ್ಘಸ್ಯ ರೋಗಾನ್ ಸದಾ ಸಂಹರಂತಂ ।
ಓಂಕಾರತತ್ತ್ವಂ ವದನ್ತಂ ಶಮ್ಭುಕರ್ಣೇ ಹಸನ್ತಂ ಭಜೇಽಹಂ ಶಿಶುನ್ತಮ್ ॥೫॥

ಸ್ತೋತ್ರಂ ಕೃತಂ ಚಿತ್ರ ಚಿತ್ರಂ ದೀಕ್ಷಿತಾನಂತರಾಮೇಣ ಸರ್ವಾರ್ಥಸಿದ್ಧ್ಯೈ ।
ಭಕ್ತ್ಯಾ ಪಠೇದ್ಯಃ ಪ್ರಭಾತೇ ದೇವದೇವಪ್ರಸಾದಾತ್ ಲಭೇತಾಷ್ಟಸಿದ್ಧಿಮ್ ॥೬॥

॥ ಇತಿ ಶ್ರೀಅನಂತರಾಮದೀಕ್ಷಿತೇನ ವಿರಚಿತಂ ಶ್ರೀಸ್ವಾಮಿನಾಥಸ್ತೋತ್ರಮ್ ॥