ಶ್ರೀರಾಮರಕ್ಷಾಸ್ತೋತ್ರ

॥ ಶ್ರೀಗಣೇಶಾಯ ನಮಃ ॥

ವಿನಿಯೋಗಃ-
ಅಸ್ಯ ಶ್ರೀರಾಮರಕ್ಷಾಸ್ತೋತ್ರಮಂತ್ರಸ್ಯ । ಬುಧ-ಕೌಶಿಕ ಋಷಿಃ । ಅನುಷ್ಟುಪ್ ಛಂದಃ । ಶ್ರೀಸೀತಾರಾಮಚಂದ್ರೋ ದೇವತಾ । ಸೀತಾ ಶಕ್ತಿಃ । ಶ್ರೀಮದ್ ಹನುಮಾನ ಕೀಲಕಮ್ ।ಶ್ರೀರಾಮಚಂದ್ರ-ಪ್ರೀತ್ಯರ್ಥೇ ಶ್ರೀರಾಮ-ರಕ್ಷಾ-ಸ್ತೋತ್ರ-ಮನ್ತ್ರ-ಜಪೇ ವಿನಿಯೋಗಃ ॥
ಋಷ್ಯಾದಿ-ನ್ಯಾಸಃ-
ಬುಧ-ಕೌಶಿಕ ಋಷಯೇ ನಮಃ ಶಿರಸಿ । ಅನುಷ್ಟುಪ್ ಛಂದಸೇ ನಮಃ ಮುಖೇ । ಶ್ರೀಸೀತಾ-ರಾಮಚಂದ್ರೋ ದೇವತಾಯೈ ನಮಃ ಹೃದಿ । ಸೀತಾ ಶಕ್ತಯೇ ನಮಃ ನಾಭೌ । ಶ್ರೀಮದ್ ಹನುಮಾನ ಕೀಲಕಾಯ ನಮಃ ಪಾದಯೋ ।ಶ್ರೀರಾಮಚಂದ್ರ-ಪ್ರೀತ್ಯರ್ಥೇ ಶ್ರೀರಾಮ-ರಕ್ಷಾ-ಸ್ತೋತ್ರ-ಮನ್ತ್ರ-ಜಪೇ ವಿನಿಯೋಗಾಯ ನಮಃ ಸರ್ವಾಂಗೇ ॥

॥ ಅಥ ಧ್ಯಾನಮ್ ॥
ಧ್ಯಾಯೇದಾಜಾನು-ಬಾಹುಂ ಧೃತ-ಶರ-ಧನುಷಂ ಬದ್ಧ-ಪದ್ಮಾಸನಸ್ಥಮ್ ।
ಪೀತಂ ವಾಸೋ ವಸಾನಂ ನವ-ಕಮಲ-ದಲ-ಸ್ಪರ್ಧಿ-ನೇತ್ರಂ ಪ್ರಸನ್ನಮ್ ।
ವಾಮಾಂಕಾರೂಢ-ಸೀತಾ-ಮುಖ-ಕಮಲ-ಮಿಲಲ್ಲೋಚನಂ ನೀರದಾಭಮ್ ।
ನಾನಾಲಂಕಾರ-ದೀಪ್ತಂ ದಧತಮುರು-ಜಟಾಮಂಡನಂ ರಾಮಚಂದ್ರಮ್॥
॥ಇತಿ ಧ್ಯಾನಮ್॥

॥ಮೂಲ-ಪಾಠ॥
ಚರಿತಂ ರಘುನಾಥಸ್ಯ ಶತ-ಕೋಟಿ ಪ್ರವಿಸ್ತರಮ್ ।
ಏಕೈಕಮಕ್ಷರಂ ಪುಂಸಾಂ, ಮಹಾಪಾತಕನಾಶನಮ್ ॥ ೧॥
ಧ್ಯಾತ್ವಾ ನೀಲೋತ್ಪಲ-ಶ್ಯಾಮಂ, ರಾಮಂ ರಾಜೀವ-ಲೋಚನಮ್ ।
ಜಾನಕೀ-ಲಕ್ಷ್ಮಣೋಪೇತಂ, ಜಟಾ-ಮುಕುಟ-ಮಣ್ಡಿತಮ್ ॥ ೨॥
ಸಾಸಿ-ತೂಣ-ಧನುರ್ಬಾಣ-ಪಾಣಿಂ ನಕ್ತಂ ಚರಾನ್ತಕಮ್ ।
ಸ್ವ-ಲೀಲಯಾ ಜಗತ್-ತ್ರಾತುಮಾವಿರ್ಭೂತಮಜಂ ವಿಭುಮ್ ॥ ೩॥
ರಾಮರಕ್ಷಾಂ ಪಠೇತ್ಪ್ರಾಜ್ಞಃ, ಪಾಪಘ್ನೀಂ ಸರ್ವ-ಕಾಮದಾಮ್ ।
ಶಿರೋ ಮೇ ರಾಘವಃ ಪಾತು, ಭಾಲಂ ದಶರಥಾತ್ಮಜಃ ॥ ೪॥
ಕೌಸಲ್ಯೇಯೋ ದೃಶೌ ಪಾತು, ವಿಶ್ವಾಮಿತ್ರಪ್ರಿಯಃ ಶ್ರುತೀ ।
ಘ್ರಾಣಂ ಪಾತು ಮಖ-ತ್ರಾತಾ, ಮುಖಂ ಸೌಮಿತ್ರಿ-ವತ್ಸಲಃ ॥ ೫॥
ಜಿಹ್ವಾಂ ವಿದ್ಯಾ-ನಿಧಿಃ ಪಾತು, ಕಣ್ಠಂ ಭರತ-ವಂದಿತಃ ।
ಸ್ಕಂಧೌ ದಿವ್ಯಾಯುಧಃ ಪಾತು, ಭುಜೌ ಭಗ್ನೇಶ-ಕಾರ್ಮುಕಃ ॥ ೬॥
ಕರೌ ಸೀತಾ-ಪತಿಃ ಪಾತು, ಹೃದಯಂ ಜಾಮದಗ್ನ್ಯ-ಜಿತ್ ।
ಮಧ್ಯಂ ಪಾತು ಖರ-ಧ್ವಂಸೀ, ನಾಭಿಂ ಜಾಮ್ಬವದಾಶ್ರಯಃ ॥ ೭॥
ಸುಗ್ರೀವೇಶಃ ಕಟೀ ಪಾತು, ಸಕ್ಥಿನೀ ಹನುಮತ್ಪ್ರಭುಃ ।
ಊರೂ ರಘೂತ್ತಮಃ ಪಾತು, ರಕ್ಷಃ-ಕುಲ-ವಿನಾಶ-ಕೃತ್ ॥ ೮॥
ಜಾನುನೀ ಸೇತುಕೃತ್ಪಾತು, ಜಂಘೇ ದಶಮುಖಾನ್ತಕಃ ।
ಪಾದೌ ಬಿಭೀಷಣ-ಶ್ರೀದಃ, ಪಾತು ರಾಮೋಽಖಿಲಂ ವಪುಃ ॥ ೯॥
ಏತಾಂ ರಾಮ-ಬಲೋಪೇತಾಂ ರಕ್ಷಾಂ ಯಃ ಸುಕೃತೀ ಪಠೇತ್ ।
ಸ ಚಿರಾಯುಃ ಸುಖೀ ಪುತ್ರೀ, ವಿಜಯೀ ವಿನಯೀ ಭವೇತ್ ॥ ೧೦॥
ಪಾತಾಲ-ಭೂತಲ-ವ್ಯೋಮ-ಚಾರಿಣಶ್ಛದ್ಮ-ಚಾರಿಣಃ ।
ನ ದ್ರಷ್ಟುಮಪಿ ಶಕ್ತಾಸೇ, ರಕ್ಷಿತಂ ರಾಮ-ನಾಮಭಿಃ ॥ ೧೧॥
ರಾಮೇತಿ ರಾಮ-ಭದ್ರೇತಿ ರಾಮಚಂದ್ರೇತಿ ವಾ ಸ್ಮರನ್ ।
ನರೋ ನ ಲಿಪ್ಯತೇ ಪಾಪೈಃ ಭುಕ್ತಿಂ ಮುಕ್ತಿಂ ಚ ವಿನ್ದತಿ ॥ ೧೨॥
ಜಗಜ್ಜೈತ್ರೈಕ-ಮನ್ತ್ರೇಣ ರಾಮ-ನಾಮ್ನಾಽಭಿರಕ್ಷಿತಮ್ ।
ಯಃ ಕಂಠೇ ಧಾರಯೇತ್-ತಸ್ಯ ಕರಸ್ಥಾಃ ಸರ್ವ-ಸಿದ್ಧಯಃ ॥ ೧೩॥
ವಜ್ರ-ಪಂಜರ-ನಾಮೇದಂ, ಯೋ ರಾಮಕವಚಂ ಸ್ಮರೇತ್ ।
ಅವ್ಯಾಹತಾಜ್ಞಃ ಸರ್ವತ್ರ, ಲಭತೇ ಜಯ-ಮಂಗಲಮ್ ॥ ೧೪॥
ಆದಿಷ್ಟ-ವಾನ್ ಯಥಾ ಸ್ವಪ್ನೇ ರಾಮ-ರಕ್ಷಾಮಿಮಾಂ ಹರಃ ।
ತಥಾ ಲಿಖಿತ-ವಾನ್ ಪ್ರಾತಃ, ಪ್ರಬುದ್ಧೋ ಬುಧಕೌಶಿಕಃ ॥ ೧೫॥
ಆರಾಮಃ ಕಲ್ಪ-ವೃಕ್ಷಾಣಾಂ ವಿರಾಮಃ ಸಕಲಾಪದಾಮ್ ।
ಅಭಿರಾಮಸ್ತ್ರಿ-ಲೋಕಾನಾಂ, ರಾಮಃ ಶ್ರೀಮಾನ್ ಸ ನಃ ಪ್ರಭುಃ ॥ ೧೬॥
ತರುಣೌ ರೂಪ-ಸಂಪನ್ನೌ ಸುಕುಮಾರೌ ಮಹಾಬಲೌ ।
ಪುಂಡರೀಕ-ವಿಶಾಲಾಕ್ಷೌ ಚೀರ-ಕೃಷ್ಣಾಜಿನಾಮ್ಬರೌ ॥ ೧೭॥
ಫಲ-ಮೂಲಾಶಿನೌ ದಾನ್ತೌ, ತಾಪಸೌ ಬ್ರಹ್ಮಚಾರಿಣೌ ।
ಪುತ್ರೌ ದಶರಥಸ್ಯೈತೌ ಭ್ರಾತರೌ ರಾಮ-ಲಕ್ಷ್ಮಣೌ ॥ ೧೮॥
ಶರಣ್ಯೌ ಸರ್ವ-ಸತ್ತ್ವಾನಾಂ ಶ್ರೇಷ್ಠೌ ಸರ್ವ-ಧನುಷ್ಮತಾಮ್ ।
ರಕ್ಷಃ ಕುಲ-ನಿಹಂತಾರೌ, ತ್ರಾಯೇತಾಂ ನೋ ರಘೂತ್ತಮೌ ॥ ೧೯॥
ಆತ್ತ-ಸಜ್ಜ-ಧನುಷಾವಿಶು-ಸ್ಪೃಶಾವಕ್ಷಯಾಶುಗ-ನಿಷಂಗ-ಸಂಗಿನೌ ।
ರಕ್ಷಣಾಯ ಮಮ ರಾಮ-ಲಕ್ಷ್ಮಣಾವಗ್ರತಃ ಪಥಿ ಸದೈವ ಗಚ್ಛತಾಮ್ ॥ ೨೦॥
ಸನ್ನದ್ಧಃ ಕವಚೀ ಖಡ್ಗೀ ಚಾಪ-ಬಾಣ-ಧರೋ ಯುವಾ ।
ಗಚ್ಛನ್ಮನೋರಥೋಽಸ್ಮಾಕಂ, ರಾಮಃ ಪಾತು ಸಲಕ್ಷ್ಮಣಃ ॥ ೨೧॥
ರಾಮೋ ದಾಶರಥಿಃ ಶೂರೋ, ಲಕ್ಷ್ಮಣಾನುಚರೋ ಬಲೀ ।
ಕಾಕುತ್ಸ್ಥಃ ಪುರುಷಃ ಪೂರ್ಣಾ, ಕೌಸಲ್ಯೇಯೋ ರಘುತ್ತಮಃ ॥ ೨೨॥
ವೇದಾನ್ತ-ವೇದ್ಯೋ ಯಜ್ಞೇಶಃ, ಪುರಾಣ-ಪುರುಷೋತ್ತಮಃ ।
ಜಾನಕೀ-ವಲ್ಲಭಃ ಶ್ರೀಮಾನಪ್ರಮೇಯ-ಪರಾಕ್ರಮಃ ॥ ೨೩॥
ಇತ್ಯೇತಾನಿ ಜಪನ್ನಿತ್ಯಂ, ಮದ್ಭಕ್ತಃ ಶ್ರದ್ಧಯಾನ್ವಿತಃ ।
ಅಶ್ವಮೇಧಾಧಿಕಂ ಪುಣ್ಯಂ, ಸಂಪ್ರಾಪ್ನೋತಿ ನ ಸಂಶಯಃ ॥ ೨೪॥
ರಾಮಂ ದುರ್ವಾ-ದಲ-ಶ್ಯಾಮಂ, ಪದ್ಮಾಕ್ಷಂ ಪೀತ-ವಾಸಸಮ್ ।
ಸ್ತುವಂತಿ ನಾಮಭಿರ್ದಿವ್ಯೈರ್ನ ತೇ ಸಂಸಾರಿಣೋ ನರಃ ॥ ೨೫॥
ರಾಮಂ ಲಕ್ಷ್ಮಣಪೂರ್ವಜಂ ರಘುವರಂ ಸೀತಾಪತಿಂ ಸುಂದರಮ್ ।
ಕಾಕುತ್ಸ್ಥಂ ಕರುಣಾರ್ಣವಂ ಗುಣನಿಧಿಂ ವಿಪ್ರಪ್ರಿಯಂ ಧಾರ್ಮಿಕಮ್ ।
ರಾಜೇಂದ್ರಂ ಸತ್ಯ-ಸನ್ಧಂ ದಶರಥ-ತನಯಂ ಶ್ಯಾಮಲಂ ಶಾಂತ-ಮೂರ್ತಮ್ ।
ವಂದೇ ಲೋಕಾಭಿರಾಮಂ ರಘು-ಕುಲ-ತಿಲಕಂ ರಾಘವಂ ರಾವಣಾರಿಮ್ ॥ ೨೬॥
ರಾಮಾಯ ರಾಮ-ಭದ್ರಾಯ ರಾಮಚಂದ್ರಾಯ ವೇಧಸೇ ।
ರಘುನಾಥಾಯ ನಾಥಾಯ ಸೀತಾಯಾಃ ಪತಯೇ ನಮಃ ॥ ೨೭॥
ಶ್ರೀರಾಮ ರಾಮ ರಘುನಂದನ ರಾಮ ರಾಮ । ಶ್ರೀರಾಮ ರಾಮ ಭರತಾಗ್ರಜ ರಾಮ ರಾಮ ।
ಶ್ರೀರಾಮ ರಾಮ ರಣ-ಕರ್ಕಶ ರಾಮ ರಾಮ । ಶ್ರೀರಾಮ ರಾಮ ಶರಣಂ ಭವ ರಾಮ ರಾಮ ॥ ೨೮॥
ಶ್ರೀರಾಮಚಂದ್ರ-ಚರಣೌ ಮನಸಾ ಸ್ಮರಾಮಿ । ಶ್ರೀರಾಮಚಂದ್ರ-ಚರಣೌ ವಚಸಾ ಗೃಣಾಮಿ ।
ಶ್ರೀರಾಮಚಂದ್ರ-ಚರಣೌ ಶಿರಸಾ ನಮಾಮಿ । ಶ್ರೀರಾಮಚಂದ್ರ-ಚರಣೌ ಶರಣಂ ಪ್ರಪದ್ಯೇ ॥ ೨೯॥
ಮಾತಾ ರಾಮೋ ಮತ್ಪಿತಾ ರಾಮಚಂದ್ರಃ । ಸ್ವಾಮೀ ರಾಮೋ ಮತ್ಸಖಾ ರಾಮಚಂದ್ರಃ ।
ಸರ್ವಸ್ವಂ ಮೇ ರಾಮಚಂದ್ರೋ ದಯಾಲುಃ । ನಾನ್ಯಂ ಜಾನೇ ನೈವ ಜಾನೇ ನ ಜಾನೇ ॥ ೩೦॥
ದಕ್ಷಿಣೇ ಲಕ್ಷ್ಮಣೋ ಯಸ್ಯ, ವಾಮೇ ತು ಜನಕಾತ್ಮಜಾ ।
ಪುರತೋ ಮಾರುತಿರ್ಯಸ್ಯ ತಂ ವಂದೇ ರಘು-ನಂದನಮ್ ॥ ೩೧॥
ಲೋಕಾಭಿರಾಮಂ ರಣ-ರಂಗ-ಧೀರಮ್, ರಾಜೀವ-ನೇತ್ರಂ ರಘು-ವಂಶ-ನಾಥಮ್ ।
ಕಾರುಣ್ಯ-ರೂಪಂ ಕರುಣಾಕರಂ ತಮ್, ಶ್ರೀರಾಮಚಂದ್ರಮ್ ಶರಣಂ ಪ್ರಪದ್ಯೇ ॥ ೩೨॥
ಮನೋಜವಂ ಮಾರುತ-ತುಲ್ಯ-ವೇಗಮ್, ಜಿತೇನ್ದ್ರಿಯಂ ಬುದ್ಧಿ-ಮತಾಂ ವರಿಷ್ಠಮ್ ।
ವಾತಾತ್ಮಜಂ ವಾನರ-ಯೂಥ-ಮುಖ್ಯಮ್, ಶ್ರೀರಾಮ-ದೂತಂ ಶರಣಂ ಪ್ರಪದ್ಯೇ ॥ ೩೩॥
ಕೂಜನ್ತಂ ರಾಮ ರಾಮೇತಿ ಮಧುರಂ ಮಧುರಾಕ್ಷರಮ್ ।
ಆರುಹ್ಯ ಕವಿತಾ-ಶಾಖಾಂ ವಂದೇ ವಾಲ್ಮೀಕಿ-ಕೋಕಿಲಮ್ ॥ ೩೪॥
ಆಪದಾಂ ಅಪಹರ್ತಾರಂ, ದಾತಾರಂ ಸರ್ವಸಂಪದಾಮ್ ।
ಲೋಕಾಭಿರಾಮಂ ಶ್ರೀರಾಮಂ ಭೂಯೋ ಭೂಯೋ ನಮಾಮ್ಯಹಮ್ ॥ ೩೫॥
ಭರ್ಜನಂ ಭವ-ಬೀಜಾನಾಂ ಅರ್ಜನಂ ಸುಖ-ಸಮ್ಪದಾಮ್ ।
ತರ್ಜನಂ ಯಮ-ದೂತಾನಾಂ ರಾಮ ರಾಮೇತಿ ಗರ್ಜನಮ್ ॥ ೩೬॥
ರಾಮೋ ರಾಜ-ಮಣಿಃ ಸದಾ ವಿಜಯತೇ ರಾಮಂ ರಮೇಶಂ ಭಜೇ ।
ರಾಮೇಣಾಭಿಹತಾ ನಿಶಾಚರ-ಚಮೂ ರಾಮಾಯ ತಸ್ಮೈ ನಮಃ ।
ರಾಮಾನ್ನಾಸ್ತಿ ಪರಾಯಣಂ ಪರ-ತರಂ ರಾಮಸ್ಯ ದಾಸೋಽಸ್ಮ್ಯಹಮ್ ।
ರಾಮೇ ಚಿತ್ತ-ಲಯಃ ಸದಾ ಭವತು ಮೇ ಭೋ ರಾಮ ಮಾಮುದ್ಧರ ॥ ೩೭॥
ರಾಮ ರಾಮೇತಿ ರಾಮೇತಿ ರಮೇ ರಾಮೇ ಮನೋರಮೇ ।
ಸಹಸ್ರನಾಮ ತತ್ತುಲ್ಯಂ ರಾಮನಾಮ ವರಾನನೇ ॥ ೩೮॥
ಇತಿ ಶ್ರೀಬುಧಕೌಶಿಕವಿರಚಿತಂ ಶ್ರೀರಾಮರಕ್ಷಾಸ್ತೋತ್ರಂ ಸಂಪೂರ್ಣಮ್ ॥
॥ ಶ್ರೀಸೀತಾರಾಮಚಂದ್ರಾರ್ಪಣಮಸ್ತು ॥